Bituin ng Buhay

Agos nitong tubig, lagaslas ng dahon

kaybilis ng oras, takbo ng panahon

anumang pagsubok, kaylangang umahon

sa pagkakadapa'y, saan ka babangon?

Kahulugan ng buhay, sadyang masaklap

ang saya at lungkot, pagitan ay kurap

mabuti pa sana, mga alitaptap

sadya ngang malaya, paglipad sa ulap

Kadilimang ating sadyang dinadanas

bahid ng pag-asa ang magiging lunas

ito'y idudulot nilang iniatas

ilayo ang tao sa anumang dahas

Lubid ng karimlan, wala itong saysay

lakas at pag-asa, sa ati'y gagabay

ating kilalanin at bigyan ng pugay

mga tinatawag, "Bituin ng Buhay"

Kakayanin natin ang mga problema

direksyon at ilaw, tulong sa pag-asa

mga inspirasyon, tawag sa kanila

dahil sila'y sugo ng Poong Lumikha

Created last: March 9, 2000